時薪員工算係公司正式員工嗎？
里奧叔叔收到太多朋友PM 我問呢個問題，另外都有好多朋友問關於需要注意既事項，今日就盡力同大家分享下。
台灣有最低薪金保障，2020年時薪規定不能少於$158/小時，而月薪就不能少於$23800 /月，除此之外不論是時薪或月薪都需要替員工投保，包括勞退、健保和勞工保險『簡稱勞 健 退』，而投保既比例與金額都好容易google搵到，里奧叔叔就唔浪費時間分享啦，大約係薪金既17%左右啦。
重點係要搞清楚勞 健 退係咩情況之下一定要投呢？呢個資料上網就比較難查到，里奧同大家分享一下。
1, 勞保（勞工保險）：就係萬一員工因工受傷既保險，如果你既公司員工數目係5人以下就冇需要強制性投保，因為勞工保險投保既成本係薪金10% ，而5人以下既公司可以選擇另一種保險叫（就業保險），呢種就業保險保費便宜，但好多野都唔包，簡單講就係萬一員工因工受傷的話，雇主要負上責任，所以就算里奧每間分店既員工人數都只得4-5人，里奧都一樣幫員工投勞工保險，就算員工一個月只返工一日，勞基法都有規定必需投保。
2, 勞退 （勞工退休金）：顧名思義就係幫員工供款作退休保障，投保成本就按每個月薪金既6%投保，如果員工「不論兼職與否」實領薪金有超過勞基法規定的最低月薪，勞退就依照相關表格上金額申報，但如果時薪員工一個月實領薪金不超過$11100 的話，同樣是以$11100 去計算。
都仲係唔明？我再舉一個例子比大家。
員工A : 時薪$200 x 8小時/日，每月上班4天。$1600 x 4天= $6400 薪金
雖然薪金只有$6400 , 但勞保和勞退一樣要以$11100 來申報，點解？冇點解㗎規定就係咁。
員工B : 月薪$28500/月，咁就按$28800 去計算，又點解？因為勞保局會有一張list 去寫明投保薪金標淮，只能報高不能越少，用清單上最接近既數字申報。
3, 健保（健康保障）：呢個大家應該唔會陌生，就係台灣最出名既健保，有健保生活真係好，不過今日係講緊咩情況要幫員工投保。
月薪員工就一定要投保，做法與勞保一樣，申報左月薪就會收到單，公司比大份，員工比細份，分攤清單都係google 好易搵到，里奧就唔多講啦。
時薪就有好幾計法
《一》每週上班不超過12小時，不用投健保。
《二》每週上班不超過12小時不需投健保，但如一週上班有5天就算合共不過12小時，就需要投健保。
《三》員工有兩份以上時薪工作，只需要在每月收入最高那間公司投健保便可以。
咁咩叫正式員工呢？呢度有兩個立場。
我相信大家最關心既係投資移民新政策下，投審會規定要請兩名台籍員工既規定，到底可唔可以請兼職呢？
呢個就要睇睇相關規定。
投審會既規定係咁寫的
《預計僱用臺籍員工數，如為投資設立新事業，每年維持至少2名以上》
從文字上並冇規定員工一個月要返幾多日工，亦未有寫明薪金唔可以少過幾多錢，咁即係話暫時未有實際規定。
但係里奧叔叔又聽講話有人打去投審會問過，承辦人員既答法話一定要全職，我都相信打去問的話一定會咁樣答，不過投審會咁寫法，會唔會係漏動呢？又幾時會修正呢？
勞工局既角度又係點呢？
里奧分享左自己其中一間分店既勞退單，當中一共有5名員工，而其中一位2月尾離職，當中有兩名月薪及三名時薪，從單上薪金最容易睇到$11100那位一定係兼職，但其他四個呢？睇唔出吧🤣
下次再分享一下請員工要注意既事，唔好有機會被員工告。
#里奧叔叔
#投資移民
#移民台灣
#台灣營商
Search